షష్ఠః ప్రశ్నః

అథ హైనం సుకేశా భారద్వాజః పప్రచ్ఛ -
భగవన్ హిరణ్యనాభః కౌసల్యో రాజపుత్రో మాముపేత్యైతం ప్రశ్నమపృచ్ఛత -
షోడశకలం భారద్వాజ పురుషం-వేఀత్థ। తమహం కుమారమబ్రువం నాహమిమం-వేఀద యద్యహమిమమవేదిషం కథం తే నావక్ష్యమితి ।
సమూలో వా ఏష పరిశుష్యతి యోఽనృతమభివదతి। తస్మాన్నార్​హమ్యనృతం-వఀక్తుం। స తూష్ణీం రథమారుహ్య ప్రవవ్రాజ। తం త్వా పృచ్ఛామి క్వాసౌ పురుష ఇతి ॥1॥

తస్మై స హోవాచ ।
ఇహైవాంతఃశరీరే సోమ్య స పురుషో యస్మిన్నేతాః షోడశ కలాః ప్రభవంతీతి ॥2॥

స ఈక్షాంచక్రే। కస్మిన్నహముత్క్రాంత ఉత్క్రాంతో భవిష్యామి కస్మిన్ వా ప్రతిష్ఠితే ప్రతిష్ఠాస్యామీతి ॥3॥

స ప్రాణమసృజత। ప్రాణాచ్ఛ్రద్ధాం ఖం-వాఀయుర్జ్యోతిరాపః పృథివీంద్రియం మనోఽన్నమన్నాద్వీర్యం తపో మంత్రాః కర్మలోకా లోకేషు చ నామ చ ॥4॥

స యథేమా నద్యః స్యందమానాః సముద్రాయణాః సముద్రం ప్రాప్యాస్తం గచ్ఛంతి భిద్యేతే తాసాం నామరూపే సముద్ర ఇత్యేవం ప్రోచ్యతే।
ఏవమేవాస్య పరిద్రష్టురిమాః షోడశ కలాః పురుషాయణాః పురుషం ప్రాప్యాస్తం గచ్ఛంతి భిద్యేతే చాసాం నామరూపే పురుష ఇత్యేవం ప్రోచ్యతే స ఏషోఽకలోఽమృతో భవతి తదేష శ్లోకః ॥5॥

అరా ఇవ రథనాభౌ కలా యస్మిన్ ప్రతిష్ఠితాః।
తం-వేఀద్యం పురుషం-వేఀద యథా మా వో మృత్యుః పరివ్యథా ఇతి ॥6॥

తాన్ హోవాచైతావదేవాహమేతత్ పరం బ్రహ్మ వేద। నాతః పరమస్తీతి ॥7॥

తే తమర్చయంతస్త్వం హి నః పితా యోఽస్మాకమవిద్యాయాః పరం పారం తారయసీతి।
నమః పరమఋషిభ్యో నమః పరమఋషిభ్యః ॥8॥