ఓం భ॒ద్రం కర్ణే॑భిః శృణు॒యామ॑ దేవాః । భ॒ద్రం ప॑శ్యేమా॒క్షభి॒-ర్యజ॑త్రాః । స్థి॒రైరంగై᳚స్తుష్టు॒వాగ్ం స॑స్త॒నూభిః॑ । వ్యశే॑మ దే॒వహి॑తం॒-యఀదాయుః॑ । స్వ॒స్తి న॒ ఇంద్రో॑ వృ॒ద్ధశ్ర॑వాః । స్వ॒స్తి నః॑ పూ॒షా వి॒శ్వవే॑దాః । స్వ॒స్తి న॒స్తార్క్ష్యో॒ అరి॑ష్టనేమిః । స్వ॒స్తి నో॒ బృహ॒స్పతి॑-ర్దధాతు ॥
ఓం శాంతిః॒ శాంతిః॒ శాంతిః॑ ॥

॥ ఓం బ్రహ్మణే నమః ॥

॥ ప్రథమముండకే ప్రథమః ఖండః ॥

ఓం బ్రహ్మా దేవానాం ప్రథమః సంబభూవ విశ్వస్య కర్తా
భువనస్య గోప్తా । స బ్రహ్మవిద్యాం సర్వవిద్యాప్రతిష్ఠామథర్వాయ
జ్యేష్ఠపుత్రాయ ప్రాహ ॥ 1॥

అథర్వణే యాం ప్రవదేత బ్రహ్మాఽథర్వా తాం
పురోవాచాంగిరే బ్రహ్మవిద్యామ్ ।
స భారద్వాజాయ సత్యవాహాయ ప్రాహ
భారద్వాజోఽంగిరసే పరావరామ్ ॥ 2॥

శౌనకో హ వై మహాశాలోఽంగిరసం-విఀధివదుపసన్నః పప్రచ్ఛ ।
కస్మిన్ను భగవో విజ్ఞాతే సర్వమిదం-విఀజ్ఞాతం భవతీతి ॥ 3॥

తస్మై స హోవాచ ।
ద్వే విద్యే వేదితవ్యే ఇతి హ స్మ
యద్బ్రహ్మవిదో వదంతి పరా చైవాపరా చ ॥ 4॥

తత్రాపరా ఋగ్వేదో యజుర్వేదః సామవేదోఽథర్వవేదః
శిక్షా కల్పో వ్యాకరణం నిరుక్తం ఛందో జ్యోతిషమితి ।
అథ పరా యయా తదక్షరమధిగమ్యతే ॥ 5॥

యత్తదద్రేశ్యమగ్రాహ్యమగోత్రమవర్ణ-
మచక్షుఃశ్రోత్రం తదపాణిపాదమ్ ।
నిత్యం-విఀభుం సర్వగతం సుసూక్ష్మం
తదవ్యయం-యఀద్భూతయోనిం పరిపశ్యంతి ధీరాః ॥ 6॥

యథోర్ణనాభిః సృజతే గృహ్ణతే చ
యథా పృథివ్యామోషధయః సంభవంతి ।
యథా సతః పురుషాత్ కేశలోమాని
తథాఽక్షరాత్ సంభవతీహ విశ్వమ్ ॥ 7॥

తపసా చీయతే బ్రహ్మ తతోఽన్నమభిజాయతే ।
అన్నాత్ ప్రాణో మనః సత్యం-లోఀకాః కర్మసు చామృతమ్ ॥ 8॥

యః సర్వజ్ఞః సర్వవిద్యస్య జ్ఞానమయం తపః ।
తస్మాదేతద్బ్రహ్మ నామ రూపమన్నం చ జాయతే ॥ 9॥

॥ ఇతి ముండకోపనిషది ప్రథమముండకే ప్రథమః ఖండః ॥