శ్రీ సత్యనారాయణ స్వామి వ్రతం 

ఏడాదిలో ఏ శుభదినాన అయినా శ్రీ సత్యనారాయణ స్వామి వ్రతాన్ని చేసుకోవచ్చు. వైశాఖ, కార్తిక, మాఘ మాసాలలో చేస్తే ఎంతో శుభం. మాససంక్రాంతులలో, ఏకాదశి, పూర్ణిమ తిథుల్లో చేసుకుంటే మంచి ఫలితాన్నిస్తుంది. ఏ శుభకార్యాన్నైనా ఆరంభించే ముందు లేదా ఇంట్లో శుభకార్యం చేసుకున్న తరువాత ఈ వ్రతాన్ని ఆచరించవచ్చు. పగలు లేదా సాయంత్రం ఎప్పుడైనా ఈ వ్రతాన్ని చేసుకోవచ్చు. సాయంత్రం చేసే పూజ మరింత ఫలదాయకం. ఈ వ్రతాన్ని ఇంట్లోనూ చేసుకోవచ్చు. దేవాలయాలలో, పుణ్యక్షేత్రాలలో, నదీతీరంలో, సాగర సంగమం వద్ద చేస్తే వేయింతల ఫలం లభిస్తుంది. ఈ వ్రతాన్ని కుల, లింగ, వర్గాలతో సంబంధం లేకుండా ఎవరైనా చేసుకోవచ్చు. అవివాహితలు, బ్రహ్మచారులు, విధవలు, విధురులు సైతం ఈ వ్రతాన్ని ఆచరించవచ్చు. తదనుగుణంగా సంకల్పం చెప్పుకోవాలి. ఇంటిలో ఏదైనా అశుభం జరిగినప్పుడు అంటే ఏటిసూతకం వంటివి ఉన్నప్పుడు ఏడాది లోపల ఈ వ్రతాన్ని చేసుకోకపోవడమే మంచిది. సూతకం తీరినవెంటనే చేయవచ్చు.

ఏ ఇతర వ్రతానికీ లేని ఆకర్షణ శక్తి సత్యనారాయణ స్వామి వ్రతానికి ఉంది. ఏ ఇంట పెళ్లిపేరంటం జరిగినా మొదటిగా సత్యనారాయణ వ్రతం చేస్తారు. పెళ్లితంతు పూర్తికాగానే నూతన దంపతులు గృహస్థధర్మంలో ప్రవేశించేముందుగా ఈ వ్రతాన్ని చేయడం ఆచారం. గృహప్రవేశం సమయంలోనూ భార్యాభర్తలిద్దరూ కలిసి ఈ వ్రతాన్ని చేస్తారు. సాధారణంగా దంపతీయుక్తంగా ఆలుమగలిద్దరూ కలిసి చేసుకునే ఈ వ్రతం తప్పనిసరి పరిస్థితుల్లో ఒంటరిగా చేసుకోవచ్చు. అన్నవరంలోనూ, ఇతర పుణ్యక్షేత్రాల్లోనూ సామూహిక సత్యనారాయణ వ్రతాలు విరివిగా జరుగుతుంటాయి. విష్ణుప్రియమైన వైశాఖ, కార్తిక, మాఘమాసాల్లోనూ ఈ వ్రతాన్ని ఎక్కువగా ఆచరిస్తారు.

Note:

అన్నవరంలోని శ్రీసత్యనారాయణ స్వామి ఆలయం పంచాయతన పద్ధతిలో నిర్మించారు. అందుకే ఈ వ్రతంలో పంచలోక పాలక పూజ చేస్తారు. అలాగే త్రిమూర్తులు ముగ్గురినీ పూజించిన ఫలితం సత్యదేవుని పూజతో కలుగుతుంది. అష్టదిక్కులకు అధిపతులైన అష్టదిక్పాలకులను, నవగ్రహాలను తాంబూలాలతో పూజించడం ఈ వ్రతంలోని ప్రత్యేకత. అందుకే ఈ వ్రతంతో దేవతలందరినీ పూజించిన సంతృప్తి కలుగుతుంది.